印尼甲繼續開快車，今日有三場波，焦點比賽係Persela Lamongan(佩西拉)主場對Persib Bandung(萬隆)，成為焦點原因係上星期佩西拉門神Choirul Huda喺賽事中同隊友Ramon Rodrigues相撞後死亡，今場波係Huda過身後佩西拉嘅主場比賽，球迷們要向呢位忠誠球員致敬，所以球迷爭先搶飛，最終Surajaya足球場嚴重爆棚，有幾千人入唔到場要喺場外高歌向Huda致敬。
而波方面，佩西拉同萬隆都急需3分求遠離護級線，不過上半場大家都踢得好保守，萬隆有停賽復出嘅加納名將Michael Essien(艾辛)今日大失水準，乍得現役國腳N'Douassel都冇乜發圍機會，下半場畀主隊佩西拉偷雞成功，最後萬隆輸波延續8場不勝紀錄，佩西拉就為Huda送上最佳禮物。
佩西拉贏波後反壓萬隆，喺數字上萬隆係有機會降班，如果咁都扑得中，真係可以認證到''錢唔一定係大晒''呢一句。萬隆喺季前重金邀請前車仔球員Michael Essien成為隊中marquee player，香港都有新聞媒體報道，而佩西拉請返嚟嘅marquee player(Barbosa)上季踢緊葡乙，唔睇wiki冇幾多人知乜水，大家位置差唔多，但今場Michael Essien完全被他人比下去了。