話說，傑志體育中心隔離有一塊地，本身係市政局年代規劃做休憩用途，政府就向城規會申請轉做住宅用途。前幾個月，喺撐場大聯盟嘅組織下，成功喺城規會申述中否決此處改劃申請，保留該地段為休憩用地。
原因好簡單，一來該塊單幢樓用地因配套問題唔適宜發展，二來該塊土地一定係綑綁傑志體育中心發展，一旦變做起樓，傑志體育中心一定會面臨拆遷。傑志體育中心拆遷係一件好可惜嘅事，傑志中心可以話係香港足球界其中一個里程碑，包含推動精英運動、社區運動同基層運動嘅元素，好多時段都係公眾同埋青年梯隊使用。建場耗資8400萬，15年7月落成，到而家只不過係兩年幾。傑志再次重申，搬遷後根本無可能有資源起番同樣級數嘅球場。所以，是次改劃對體育發展嘅傷害係相當之大，再次驗證特區政府「體育無用論」，完全唔重視足球發展。
最令人吊詭係，今次改劃係由soco（社區組織協會）同房委會聯手策動，soco帶左一班劏房家庭申述，聲淚俱下。明明該幅用地本身只規劃560戶資助出售房屋（居屋），論直接影響應該唔係處於劏房階梯嘅居民（公屋轉居屋釋放出黎嘅單位其實唔多），點解會有十幾廿個居民被動員，講到好似保留傑志就係逼害劏房戶？
今日嘅申述，我都有到場，我明確咁指出「基層住屋需要同基層康體需要」根本唔應該係對立，香港亦確實需要傑志足球場作為長遠體育發展之用。要拆，就拆成個荃灣咁大、得2600個會員，會籍2千萬、政府每年收1千蚊租嘅粉嶺哥爾夫球場，提供高達十萬戶嘅房屋供應，真正將公義從有錢人手中還番俾基層市民。咁嘅建議，卻得唔到咩和應。
上述狀況，無疑令我懷疑政府以賣弄悲情作為引子，以房屋需要凌駕其他需求，滿足梁振英延續至新政府嘅「盲搶地」計劃。所謂「施政新風、積極有為」，其實都係狗屁不通嘅廢話。以560戶居屋（拆遷傑志場可以起到2000戶）就轉移視線，犧牲體育發展，將體育需要同基層房居需求對立起來，圍魏救趙轉移粉嶺高球場富人用地視線，實在令人感到相當可惜。最後，城規會批準修改用途，2022即將落成單幢樓，傑志中心正式步入黃昏。
香港就好似一個鬥獸場，需要資源嘅基層永遠喺同一個場，為左爭蠅頭小利而大打出手，真正嘅統治階層，就喺看台大快朵頤等睇戲。而付出代價，永遠都是小市民。哀我香港體育發展。
注1：根據《香港規劃標準與準則》，以沙田區嘅人口，沙田區尚欠一個運動場館，四個體育中心。